Владата ќе објави четврти сет на мерки за стопанството, никој не знае колку точно се искористија за првите три
Мерките од четвртиот пакет се дефинирани. Тој претставува продолжение на претходните три и тежи 350 милиони евра, а одлуката треба денеска на седница да ја донесе Владата.
Во петокот беше одржан последниот состанок на економските тим министри и претставници на стопанските комори, а вчера за пакетот мерки имаше средба вицепремиерот за економски прашања Фатмир Битиќи и министерката за труд и социјална политика Јагода Шахпаска со Економско социјалниот совет.
Четвртиот пакет економски мерки опфаќа поддршка за исплата на плати за последниот квартал на годината, платежни картички за одредени категории граѓани на кои помошта им е најпотребна, грантови за најпогодените сектори, намалување или укинување на парафискални давачки, зголемување на грејс периодот кај бескаматните кредити од КОВИД 1 и дополнително одложување на отплата на кредитите од компаниите.
Од вкупно околу 350 милиони евра, 264 милиони се обезбедени од Буџетот на државата и околу 85 милиони како исклучително поволни дополнителни кредитни линии.
