УЈП: За враќање на целиот износ на данокот, фискалните треба да се скенираат во рок од три дена

Корисниците на апликацијата МојДДВ, за фискалните сметки издадени денеска, утре и задутре, за вкупниот промет до 30.000 денари по лице, остварен од македонски производи и услуги, како и компјутерска опрема, со нивното скенирање ќе може да го вратат целосниот износ на пресметаниот ДДВ за тие производи во фискалните сметки, соопштија од Управата за јавни приходи.

За враќање на целиот износ на данокот, како што се посочува, граѓаните треба да ги скенираат фискалните сметки во рок од три дена по нивното издавање, а доколку ги скенираат по истекот на овој рок, враќањето на ДДВ за овие производи ќе продолжи како досега, односно ќе се пресметува со 20 отсто од платениот ДДВ во фискалната сметка исто така и надминатиот износ од вкупниот промет ќе се пресметува согласно редовната пресметка односно 20 отсто.

Враќањето на целосниот износ на ДДВ ќе се изврши во рок од 15 дена од денот на скенираните сметки, додаваат од Управата за јавни приходи.