Светиниколски „Комуналец“ се поднови со опрема за чистење снег

Јавното комунално претпријатие „Комуналец“-Свети Николе набави нова механизација и опрема за чистење на снегот од улиците и локалните патишта во општината. Директорот Александар Давитков вели дека новата опрема е во износ од 2.100.000 денари.

-Со овие парични средства набавивме нов трактор со приколка, како и придружна опрема од нож за чистење снег, мулчер за чистење на банкините на локалните патишта, распракувач за сол и ризла и метларка за чистење на улиците.Со набавката на оваа опрема ќе го зголемиме квалитетот на услугите што ги реализира ЈКП „Комуналец“, рече Давитков.

Според градоначалникот на Свети Николе, Сашо Велковски, набавката на нова механизација во ЈКП „Комуналец“ е доказ оти локалната власт работи во подобрување на квалитетот на услугите.

–После долги години дубиози и непродуктивни трошења на народни пари за репрезентации и службени патувања од претходните власти, оваа локална власт успева да ја подобри сликата за нашето комунално претпријатие со намалување на трошоците, а зголемување на инвестициите во опрема и механизација, со цел ЈКП „Комуналец“ да биде вистински сервис на граѓаните на Свети Николе, рече Велковски.