Изречени мерки на претпазливост за осомничен за сообраќајката со смртни последици во Кисела Вода

Изречени мерки на претпазливост против осмоничен 25-годишен жител на село Батинци, кој учествувал во сообраќајната несреќа на на улица „Борис Трајковски“, во која животот го загубија две лица, а со телесни повреди се здобија шест лица, информираат од ОЈО.

Јавен обвинител од Основното јавно обвинителство Скопје заедно со екипа од МВР, извршија увид на самото место каде на 8 јуни 2021 година, во 23:05 часот, во Скопје, на улица „Борис Трајковски“ се случи сообраќајна несреќа во која животот го загубија две лица. По наредба на обвинителството обезбедени се и подигнати траги од лице место, обезбедена е фото документацијата од местото на настанот, издадени се наредби за сообраќајно техничко вештачење, како и за вршење обдукција на телата на починатите. Извршени се и други проверки со цел прибирање на материјални и вербални докази за натамошно расветлување на настанот.

-Според првичните сознанија на обвинителството, сега осомничениот, 25-годишен жител на село Батинци, скопско, управувал со патничко моторно возило Хундаи Акцент по левата сообраќајна лента од улицата „Борис Трајковски“. Кога пристигнал пред крстосница, непочитувајќи ги надолжните ознаки на коловозот ( удвоена бела полна линија), започнал да врши престигнување од левата страна на патничко моторно возило Фиат Пунто кое се движело пред него. Осомничениот со престигнувањето го попречил сообраќајот од спротивната насока и при тоа се судрил со патничко моторно возило Мерцедес Е-200. Од ударот, возилото на осомничениот се придвижило кон десно и удрило во патничкото моторно возило Фиат Пунто кое се обидел претходно да го престигнува. Возилото Мерцедес Е-200 од ударот се придвижило и отишло на коловозна лента наменета за сообраќај на возилата од спротивната насока, по што бил удрен од патничко моторно возило Фолсфаген Пасат и возило Фолсфаген Шаран и завршило со движењето удирајќи во метална ограда на блискиот тротоар, се вели во соопштението од ОЈО.

Од незгодата со телесни повреди се здобиле шест лица, а со тешки телесни повреди се здобило едногодишно дете.

Во сообраќајната незгода, поради тежината на здобиените повреди, на самото место животот го загубиле две лица, 28-годишен скопјанец – возачот на Мерцедес Е-200 и жител на село Студеничани на возраст од 50 години кои управувал со возилото Фолсваген Пасат.

Јавниот обвинител од Основното јавно обвинителство Скопје поведе посапка против осомничениот возач поради основано сомнение дека го сторил кривичното дело – Тешки дела против безбедноста на луѓето и имотот во сообраќајот од член 300 став 4 во врска со член 297 став 3 во врска со став 1 од Кривичниот законик.

Обвинителството предложи до Основниот кривичен суд Скопје, а судот со Решение ги определи предложените мерки на претпазливост на осомничениот – забрана за напуштање на живеалиштето односно престојувалиштето, обврска на осомничениот да се јавува повремено на определено службено лице, привремено одземање на патна или друга исправа за преминување на државната граница и забрана за нејзино издавање и привремено одземање на возачката дозвола и забрана за издавање на нова возачка дозвола.