Рускиот боксер Бивол ја задржа светската титула

Рускиот боксер Дмитри Бивол ја задржа WBA титулата во полутешка категорија, совладувајќи го во Лас Вегас со едногласна одлука на судиите Мексиканецот Саул Канело Алварез.

За 31-годишниот Русин тоа беше 20. победа во исто толку дуели, додека 31-годишниот Мексиканец го претрпе вториот пораз во својата 61. борба, откако во 2013 година беше поразен и од Флојд Мејведер.

– Денеска докажувам дека сум најдобар во својата категорија. Знам дека луѓето го сакаат Канело. Тој е најголемиот борец во светот. Луѓето се на негова страна, изјави Бивол по синоќешната борба во Лас Вегас.

Мексиканскиот боксер го призна поразот и најави реванш.

– Бивол е голем шампион. Во боксот некогаш победуваш, а некогаш губиш. Денеска јас загубив, но ова не завршува вака. Секако дека сакам реванш, изјави Алварез.