Во Виница почнува вториот дел од детската работилница „Театар на сенки“

Од викендов во Виница почнува вториот дел на детската работилница „Театар на сенки“, што како проект поддржан од Министерството за култура успешно се реализираше во Кочани во текот на мај и јуни годинава.

Под мотото „Од имагинација до креација“, целта на работилницата е децата на возраст од 8 до 12 години да стекнат нови знаења и вештини на креативен и забавен начин, а преку работа во група и социјализација, да се запознаат со процесот на создавање театарска претстава со сенки.

Обуките ќе се реализираат во Домот на културата „Тошо Арсов“, секоја сабота до крајот на октомври, а со најмладите ќе работат дипломираните актери Нина Максимова, Благојчо Стојанов и Јанка Лефкова од Кочани.

– Нашата идеја е да ги вклучиме најмладите во креирањето на културна програма што е намената за нивните врсници. Истовремено, сакаме да им помогнеме да ја зајакнат самодовербата, да го подобрат правоговорот и да го збогатат личниот вокабулар. Преку создавање приказни, што ќе ги пишуваат самите учесници со мала интервенција од наша страна околу драматуршкиот дел и поделбата на улогите, ќе работиме на подобрување на когнитивниот и физички развој, како и на ослободување на имагинацијата и нејзино финализирање во креативен производ. Заедно со децата ќе ги изработиме фигурите, а во завршницата ќе ја вежбаме играта пред светло и интерпретацијата на ликовите, истакна актерката Нина Максимова.

Пријавувањето на заинтересираните за учество на работилницата е бесплатно и трае до 16 септември, а бројот на групите е ограничен заради поефикасно работење и обука. Како завршница на проектот ќе бидат прикажани кратки пиеси, во чија креација и изведба ќе учествуваат децата.