Николче Ѓорѓиевски прв на Брзопотезниот турнир во шах во Велес

На Брзопотезниот турнир во шах што во изминатите три дена се одржуваше во Велес, првото место го освои Николче Ѓорѓиевски, второто Трајче Недев и третото Менсур Бачевац. Турнирот го организираше Градски шаховски клуб „Велес“ во соработка со Здружението на пензионери во чии простории се одржуваше турнирот, а под покровителство на Општина Велес во рамките на програмата на 9-ти Ноември ден на ослободување на Велес.

Имаше 22 учесници од 9 до 83 години, а се играше според Бергеров Швајцарски систем секој со секого. Имаше 22 кола, а синоќа се одржаа последните осум кола, информира за МИА Ристе Трајановски претседател на ГШК „Велес“.

-Целтта на турнирот кој планираме да стане традиционален е да го потикнеме играњето шах посебно помеѓу младите, бидејќи со играње на шах се развиваат интелектуалните способности кај децата за размислување и расудување. Воедно ја поздравуваме идејата на Министерството за образование и наука, шахот да се воведе во наставата во училиштата. Ние како шаховски клуб и повеќегодишни шахисти со искуство им го нудиме своето знаење и искуство, потенцира Трајановски.

Првопласираниот, 52-годишниот Николче Ѓорѓиевски во разговор за МИА информира дека шах активно игра од 1986 година во тогашниот Шаховски клуб „Единство“ кој постоеше до крајот на минатиот век.

-Потоа се се растури, ни ја земаа просторијата и немавме услови за работа, па згаснаа и натреварите во шах, појаснува Ѓорѓивески.

Тој и останатите шахисти во 2015 година направиле напори да формираат нов шаховски клуб „Велес“ и последнава година-две, работат на заживување на шахот во градот, посебно кај младите. Велешките шахисти велат дека засега најголем проблем им е немањето просторија. Тие се надеваат дека локалната власт наскоро ќе им даде просторија каде ќе можат да се среќаваат и да играат шах и воедно и да се натпреваруваат.

Тие информираат дека засега се натпреваруваат на државното првенство во шах индивидулно една група на велешки шахисти, но наскоро планираат да се натпреваруваат како Градски шаховски клуб „Велес“.