Почна пријавувањето за ФИЛМАЈ 2023

Денеска почнува пријавувањето за петтото издание на фестивалот за краток филм ФИЛМАЈ, соопштија денеска организаторите, фото-кино клуб “Козјак” – Куманово.

Кратките играни филмови (со траење до 20 минути и завршени после 1 јануари 2021), до 31 март 2023 година може да се пријават преку платформите FilmFreeway и festhome .

Филмовите може да конкурираат за награда “Лазар Ѓорѓевиќ” за најдобра режија, награда “Радислав Ристевски” за најдобра фотографија/кинематографија, награда “Koзјак” за најдобрo сценарио и награда “ФИЛМАЈ” за најдобар краток филм.

Македонските (домашни) филмови може да конкурираат за награда за најдобар македонски филм, а може да се пријават во меѓународна конкуренција за горенаведените награди.

Фестивалот е планирано да се одржи во две последователни вечери на локација на отворено во Куманово во мај 2023 година.

Претходница на главната фестивалска вечер ќе биде проекциска ревија на филмови од претходните изданија на ФИЛМАЈ, како и промоции на книги со филмска тематика од македонски автори.

Повеќе детали за фестивалот има на Фејсбук-страната fb.com/filmaykozjak . На истата страна ќе бидат објавувани новости и информации во врска со фестивалот.