Отворање на групна изложба „Каде текла реката, пак ќе тече“ во КСП Центар Јадро

Во КСП „Центар Јадро“ вечерва од 20 часот ќе биде отворена групната изложба „Каде реката текла, пак ќе тече“, која „Јадро“ ја реализира во соработка со Центарот за истражување и информирање за животната средина „Еко-Свест“.

- На отворениот повик за фото и видео есеи во рамки на регионалната кампања за заштита на реките „Save the blue heart of Europe“ беа селектирани проектите на авторите Ивана Самандова, Филип Лафазановски и Влатко Деков, информираат од КСП „Центар Јадро“.

Од културниот центар посочуваат дека фокусот на „Каде реката текла, пак ќе тече“ е изградбата на малите хидроцентрали на територијата на државата кој оставаат непоправливи последици по животната средина и природата, до степен кој, како што велат, го загрозува опстанокот на водните екосистеми и на заштитените и ендемски животински и растителни видови.

- Уметниците и претставниците на „Еко Свест“ имаа повеќе теренски посети на локации во заштитени подрачја каде има изградени мали хидроцентрали. Тие преку фотографија и видео се осврнуваат на штетите врз природата кои ги предизвикува нивната изградба, истакнуваат од „Јадро“.