Оперски гала концерт со Александрина Пендачанска утре во Скопје

Оперската дива Александрина Пендачанска утре вечер ќе одржи гала концерт во Националната опера и балет. Настанот е организиран со поддршка на Бугарскиот културно-информативен центар во Скопје. Диригент на Оркестарот на НОБ ќе биде маестро Бисера Чадловска, а концерт-мајстор е Климент Тодороски.

Светски познатата оперска дива пред љубителите на класичната музика во Скопје ќе исполни арии од Бах, Моцарт, Бизе, Верди, Росини, Леонкавало, Џордано и други. Посебно учество ќе имаат ученичката на Александрина Пендачанска и оперска ѕвезда во подем Ралица Богданова - сопран, како и домашните изведувачи Зоран Сотиров - тенор и Марјан Јованоски - баритон.

Александрина Пендачанска е родена во семејство на значајни музичари, а на 5-годишна возраст почнала да учи пијано во Националното музичко училиште „Љубомир Пипков“ - Софија. Дипломирала пијано и пеење, а вокален педагог била мајка и - оперската ѕвезда Валери Попова (сопран). Пендачанска дебитираше на 17 години со аријата на Виолета од Вердиевата „Травијата“, изведена од познатата Гена Димитрова на гала концерт во Софија. Две години подоцна, таа го имаше своето деби на оперската сцена како Лучија де Ламермур во Билбао. Добитник е на престижни награди на натпревари ширум светот.

Во последните сезони, Александрина Пендачанска настапуваше на престижни оперски сцени - во Минхен, Берлин, Брисел, Виена, Копенхаген, Лион, Торонто, Неапол, Екс-ан-Прованс, Мадрид, Хамбург, Санта Фе, Токио, Варшава, Баден-Баден, Тулон, Авињон, Москва. Неодамнешното гостувањето на Александрина Пендачанска како Лејди Магбет во новата продукција на операта Магбет во Гран Театро ди Лицеу во Барселона доживеа голем успех. Бугарскиот сопран учествуваше во премиерната продукција за отворањето на Бољшој театарот „Руслан и Људмила“, изведе воен реквием од Британија со Лондонската филхармонија на фестивалот „Ростропович“ под диригентство на Владимир Јуровски. Нејзиниот репертоар вклучува и реквием од Верди, Стабат матер и мала свечена миса од Росини, „Крал Давид“ од Онегер итн.