Конкурс на фестивалот „Литера“ за илустрација за деца на тема „Свет со љубов“

Меѓународниот фестивал за литература и илустрација за деца „Литера“ распишува конкурс за авторски илустрации на тема „Свет со љубов“. Заинтересираните илустратори може да се пријават со најмалку две до најмногу пет авторски дела – илустрации за деца. Конкурсот е отворен до 30 април.

-Од пристигнатите дела ќе бидат избрани петмина илустратори. Тие заедно со повеќе реномирани илустратори од регионот ќе учествуваат на годинашното петто издание на фестивалот „Литера“ што ќе се одржи во мај во Музејот на современата уметност во Скопје. Изложбата наесен ќе патува и во Загреб, во македонскиот Културно-информативен центар, соопшти фестивалот „Литера“.

Заинтересираните автори своите дела со куса биографија (на една страница) треба да ги пријават на: litera.festival@gmail.com со назнака: За конкурсот на „Литера“. Селекцијата ќе ја прави комисија, а победниците ќе бидат соопштени најдоцна до 8 мај.

Фестивалот „Литера“ минатата година првпат организираше изложба на македонска современа илустрација, во рамки на фестивалот на детска сликовница „Овца во кутија“ што се одржа во истарскиот град Пазин.

-Изложбата доби одличен одѕив и одушевување на публиката и критиката. Фестивалот и во своето петто издание годинава ќе понуди богата програма фокусирана на илустрацијата и литературата за деца, информира „Литера“.