Промоција на книжевни дела од Јасмина Јошевска во Делчево

Со промоција на книжевни дела од авторката Јасмина Јошевска, Јавната локална библиотека ,,Илинден" од Делчево денеска го одбележа 21 март, Светскиот ден на поезијата. Во рамки на настанот како што информираше директорката на библиотеката Биљана Петровска беа промовирани 7 дела од македонската авторка. -Промовираме дела од кои повеќето се збирки поезија и еден роман од нашата авторка. Јавната локална библиотека отсекогаш ги поддржувала сите наши македонски автори, особено не радува што денес имаме таква можност за Светскиот ден на поезијата. Од име на установата на авторката и посакуваме уште многу нови дела и многу промоции, рече Петровска. Авторката Јошевска изрази задоволство што пред присутните имаше можност да каже нешто повеќе за своите шест збирки поезија својот мини роман, за кои црпи инспирација од секојдневието. Упати порака за уште поголема поддршка на македонските автори кои според неа тоа го заслужуваат. Библиотеката во моментот ги има набавено сите дела од авторката, меѓу кои Долина на солзите, Клавир на животот, Од чешмата на времето и други, кои од утре ќе бидат достапни за читателската публика од Делчево.