Фестивалот „Литера“ ќе откупи дела на илустратори кои ќе учествуваат на конкурсот „Свет со љубов“

Фестивалот „Литера“ ќе откупи дела на илустратори кои ќе учествуваат на конкурсот „Свет со љубов“. Тој е отворен до 30 април и е наменет за професионални илустратори. Сите заинтересирани може да се пријават со не помалку од две, а не повеќе од пет авторски дела, информираат од „Литера“.

Откуп на професионални илустрации ќе врши Меѓународниот фестивал за литература и илустрација за деца „Литера“, кој ќе се одржи од 23 до 27 мај во Музејот на современата уметност во Скопје.

- Од пријавените уметници ќе бидат избрани пет илустратори, а од секој од петтемина фестивалот „Литера“ ќе откупи најмалку по едно дело. Нивните илустрации ќе бидат дел од годинашната изложба на „Литера“ во МСУ на која ќе учествуваат реномирани илустратори од регионот. Изложбата во октомври ќе биде поставена и во македонскиот Културно-информативен центар во Загреб, известуваат од „Литера“.

Сите заинтересирани автори своите дела со куса биографија (на една страница) да ги пријават на имејл адресата: litera.festival@gmail.com со назнака: За конкурсот на „Литера“. Селекцијата ќе ја прави комисија, а победниците ќе бидат соопштени најдоцна до 10 мај.