Куратица се подготвува за 26 издание на Василичарскиот карневал под маски

Во охридското село Куратица во тек се последните подготовки за традиционалниот карневал под маски што по повод празникот на селото Свети Василиј Велики ќе се одржи по 26-ти пат.

Организаторот на манифестацијата, Здружението „Свети Василиј“ и селската Месна заедница, најавија дека и за ова карневалско издание традиционалниот дел е неизменет, со почеток на 13 јануари вечерта кога зетот, невестата, бајачот, валегачот, музикантите и други учесници тргнуваат во посета на сите домаќинства во селото. Станува збор за традиција со која жителите го бркале злото и носеле радост во домовите.

Главната содржина на манифестацијата односно карневалот под маски е предвидено да почне на 14 јануари од 19 часот, со дефиле на учесниците, по што ќе бидат прогласени и најуспешните и најоригиналните креации.

Целата манифестација ќе биде надополнета со богата забавна содржина, музика, забава и огномет.

Маскенбалот во Куратица има долгогодишна традиција. Жителите на Куратица велат дека карневалот е стар исто колку што е старо и селото. Според непотврдени податоци датира од далечната 1575 година. Карневалот под маски каков што се организира беше возобновен во 1988 година како своевидна туристичка атракција.