Повеќе дена неколкукратно е зголемено присуството на штетните и отровни ПМ10 честички во Тетово
Крајот на јануари и почетокот на февруари во Тетово е со интензивно загаден воздух, за што покажуваат параметрите од мерната станица на Државниот автоматски мониторинг систем за квалитет на амбиентален воздух. Надминувањето на дозволената гранична вредност од 50 ПМ10 на метар кубен е повеќекратно па се бележат среднодневни концентрации од над 100 ПМ10.
Општина Тетово преку социјалните мрежи испрати известување дека е надминат информативниот праг за загадувачки честички со големина до 10 микрометри.
- Последните податоци за нивото на загадувачки честички (ng/m3) се следните: На 03.02.2024 година, нивоата изнесуваа 135,21 ng/m3 и на 04.02.2024 година, нивоата се движат помеѓу 122,18 и 135,28 ng/m3. Надминувањето на овие гранични вредности може да има негативни последици за јавното здравје. Ве советуваме да ги преземете неопходните мерки за да се заштитите себеси и другите од негативните ефекти на загадениот воздух. Се молат граѓаните да ги следат вестите и официјалните соопштенија од локалните власти за дополнителни информации за оваа состојба. Ако Ви треба дополнителна помош или совет, ве молиме контактирајте ги локалните власти надлежни за животна средина, посочија од Општина Тетово.
Во текот на 2023 година имало 89 денови со загаден воздух односно покажуваат сите 12 месечни извештаи на Државниот автоматски мониторинг систем за квалитет на амбиентален воздух за Тетово. Во една календарска година според светските здравствени стандарди не треба да има повеќе од 35 денови со загаден воздух.
Од друга страна, изминатата година е четврта по ред како опаѓа бројот на денови кога имало аерозагадување. Во 2022 година биле загадени 108 денови, во 2021 имало 132 денови со загаден воздух, а во 2020 година од 366 денови 138 биле со загаден воздух во Тетово. Тетовци најмногу се соочуваа со загадениот воздух во 2015 година со оглед дека од 365 денови дури во 350 имало високо присуство на штетните ПМ10 честички.
