Одбележани 150 години од раѓањето на Васил Чакаларов

Здруженијата на Македонците со потекло од Егејска Македонија денеска во Скопје одбележа 150 години од раѓањето на македонскиот револуционер Васил Чакаларов.

На настанот присуствуваа претставници од здруженијата, историчари, како и други лица од македонскиот општествен живот. Историчарот м-р Илија Василески изложи кус осврт на животот и делото на војводата Чакаларов кој, инаку, е по потекло од Егејска Македонија.

Васил Христов Чакаларов (1874 – 1913) е деец и војвода на МРО, роден на 22 февруари 1874 во селото Смрдеш, Костурско. Се истакнал во организирање канали за пренесување оружје и муниција за потребите на Организацијата, а и во борбата против тогашната грчка вооружена пропаганда, како и против сите чинители кои ја попречувале каузата за македонска држава, нагласи Василески.

Војводата учествувал на Смилевскиот конгрес како член на Горското началство, а потоа како раководител на чета бил дел и од Илинденското востание во Костурската Околија. Со свој одред се борел и во Втората балканска војна, 1913 година, кога загинал во судир со грчки трупи.

Повеќе извори наведуваат дека кога противничките војници го убиле Чакаларов, му ја отсекле главата и, со извиците: „Го нема Чакаларов! Ја нема Македонија!“ – ја носеле како воен трофеј во Леринско, потсети Василески во својот осврт, како и другите говорници.

На настанот беше промовирана и новата книга „Васил Чакаларов“ на историчарот Никола Жежов