Почна да се гради нов Дневен центар за лица со попреченост во Кавадарци

Почна да се гради нов Дневен центар за лица со попреченост од различни возрасти во Кавадарци, инвестиција од четириесетина милиони денари.

- После 19 години од отворањето на постоечкиот дневен центар во општината, ќе се добие нов и современ центар за лицата со попреченост, со многу подобри услови за престој за нив, рече министерот за труд и социјална политика Ѓоко Велковски, кој денеска беше во работна посета на Кавадарци.

Кавадаречкиот градоначалник Митко Јанчев рече дека Општината го направила проектот пред три години, заедно со Министерството за труд и социјална политика, дека целта е максимално да се посвети внимание на сите лица со попреченост и да се постигне максимумот од нивните можности. Локалната самоуправа партиципирала со десетина проценти во делот на изградбата.

Задоволство изразија и родители на деца со посебни потреби. Тие рекоа дека нивните деца и досега биле згрижени и среќни во постоечкиот центар, но овде ќе биде подобро бидејќи ќе имаат повеќе простор, ќе има нови методи на работа со нив.