Историски час во Битола - „Три епизоди од историјата на жените“

Меѓународниот ден на жената во Битола се одбележа со историски час на тема „Три епизоди од историјата на жените“, посветен за историјата на жените од македонското и светското минато.

На историскиот час во Битола, историчарката Ивана Хаџиевска говореше за учителките Недела и Станислава Петкови и за важноста на образованието на девојчињата на преминот помеѓу 19 и 20 век, како и за создавањето на првото женско списание „Македонка – Орган на АФЖ“, а Фатма Бајрам Аземовска говореше за како што рече, за дел од жените кои го променија светот. -Жените низ годините, со нивната храброст и одлучност се доказ дека не секогаш женскиот пол е и понежниот. Тешко е да се набројат сите жени кои придонеле денес да живееме подобро, истакна Бајрам Аземовска.

Пред аудиториумот во Битола, Викторија Михајловска од невладината огранизација „Сумнал“ зборуваше за проектот „Ромски школи за феминизам и лидерство во Европа“.

Од НУ Универзитетска библиотека „Св. Климент Охридски“-Битола, домаќин и организатор на настанот информираа дека од денеска за битолските основци и средношколци е објавен повик за пишување есеи на тема „Историјата на жените од македонското минато до денеска“.