Еко-акција „Недела на пролетта“ во Битола

Локалните јавни комунални претпријатија од Битола во рамки на еко-акцијата „Недела на пролетта“ подигнаа 280 матри кубни отпад, засадија дрвца, оформија нови цветни површини и поставуваат нови клупи и канти за отпадоци во градот.

Носител на акцијата која е во тек е ЈП „Комуналец“-Битола и се реализира во соработка со ЈКП „Нискоградба“ и ЈП „Водовод“, посочи Горан Степановски, директор на ЈП „Комуналец“-Битола. -Расчистивме над 280 кубни метри отпад во кој доминира стар мебел, апарати за домаќинство, картонска амбалажа и друг смет кој ја уништува животната средина, оштетени се претходни садници и млади дрвца. Апелираме граѓаните заедно со нас да придонесуваат за разубавување на градот и затоа со оваа акција влијаеме врз јавната свест и за заедничко дејствување, истакна Степановски.

Во рамки на акцијата на Широк Сокак поставени се нови клупи, уреден е градскиот парк, а денес се засадуваа дрвца во новоформираниот парк во Нова Битола.

-Ќе продолжиме со расчистување на дивите депонии, но потребна е соработка и со граѓаните. На располагање имаме 15 камиони и можеме секогаш и секому да помогнеме, појасни Степановски. Еко акцијата „Недела на пролетта“ ќе биде заокружена утре со уште еден јавен настан, односно отворање на кугланата во спортската сала „Боро Чурлевски“ во Битола.