Реваншот меѓу Усик и Фјури закажан за октомври во Саудиска Арабија

Саудискиот кралски советник со ранг министер и актуелен претседател на Генералната управа за забава во Саудиска Арабија, Турки Ал-Шеик, изјави дека без оглед на исходот од борбата меѓу шампионот во тешка категорија на ВБА, ИБФ и ВБО, Олександр Усик (21-0) и шампионот на ВБЦ во тешка категорија, Тајсон Фјури (34-0), нивниот реванш ќе се одржи на 12 или 13 октомври во Ријад, Саудиска Арабија.

Ал Шеик ова го изјави во интервју за „ЕСПН“.

Истовремено, до крајот на годината е одложена борбата меѓу шампионот на ИБФ, ВБЦ и ВБО во полутешка категорија, Артур Бетербиев (20-0) и шампионот на ВБА и ИБО во полутешка категорија, Дмитри Бивол (22-0).

Фјури и Усик требаше да се сретнат во рингот на 17 февруари, но борбата беше одложена за 18 мај поради посекотина над десното око што ја претрпе Фјури за време на спаринг. Двајцата борци се договорија за нов датум, локацијата на борбата останува иста – „Кингдом Арена“ во Ријад, Саудиска Арабија.