Само 20-тина илјади членови на СДСМ ќе избираат нов претседател на партијата
СДСМ денеска на вонредни внатрепартиски избори ќе избира нов лидер на партијата. Гласањето ќе се одвива на 77 избирачки места ширум земјава, а своето право на глас ќе можат да го остварат околу 23 илјади акредитирани партиски членови.
Во трката за нов лидер на СДСМ остануваат поранешниот министер за здравство и актуелен пратеник Венко Филипче, директорот на ТИРЗ Јован Деспотовски, како и поранешниот заменик министер во МИОА Александар Бајдевски, откако поранешната министерка за одбрана и актуелна пратеничка Славјанка Петровска, вчера, на еден ден пред изборите ја повлече кандидатурата.
Преку официјално писмо до Централната изборна комисија за претседателските избори во СДСМ, Петровска побара нејзиното име да не стои на избирачкото ливче, иако вчера во изјава за медиумите рече дека таа сепак ќе се најде на избирачкото ливче, бидејќи материјалите биле веќе отпечатени. Таа ги повика останатите тројца кандидати да се откажат од внатрепартиското гласање за избор на претседател на партијата, бидејќи, како што рече, изборниот процес бил нефер, односно еден од противкандидатите имал пристап до базата на податоци и ги злоупотребувал личните податоци на членовите на партијата. Посочи дека до неа стигнале информации дека во определени општински организации се појавиле одреден број гласачи, кои не побарале да бидат регистрирани, односно, како што рече, некој користејќи ги алатките во нивно име ги регистрирал.
Четворицата кандидати месецов водеа предизборна кампања, најавувајќи реформи во партијата, како и обединување на членството.
Претседателката на Централната изборна комисија за избор на претседател на СДСМ, Викторија Аврамовска-Мадиќ, рече дека Комисијата работела напорно за да спроведе транспарентен и демократски процес, затоа внатрепаритското гласање в недела ќе се одржи. Во врска со вчерашните забелешки на Петровска, Мадиќ рече дека тоа е нејзино право. Нагласи дека дел од доставените приговори од страна на некои општински организации биле прифатени, дел не.
Деспотовски, на средби со членовите во Карпош и Кисела Вода, во петокот рече дека програмата „Нов почеток, Нов СДСМ“ е веќе дополнета со сите, над 200 пристигнати предлози од членовите, меѓу кои е и подготовка на правилник со утврдување на критериуми за кандидати за функции, навремено профилирање на потенцијални кандидати за функции и следење на фидбекот на јавноста за потенцијалните кандидати кое ќе се примени веќе од октомври за кандидатите за градоначалник, воведување на принцип на менторство за избрани односно предвидени кандидати за функции, финансиска независност на СДММ и Форумот на жени со одреден процент на надомест од средствата добиени од буџетот.
-Пораката е дека се незадоволни од состојбите во партијата и на 30.06, во недела сите тие ќе се определат дали се за нов почеток или ќе одиме по старо. На 30.06 ние ќе имаме референдум и тој референдум ќе биде успешен. Она што е важно е дека СДСМ нема да се обедини околу човек ниту програма, СДСМ ќе се обедини околу јасен став, принципи и нов почеток. Заедно ќе дефинираме јасни принцип и ставови за клучни прашања важни и за државата и за граѓаните, коишто ги немавме изминативе години, порача Деспотовски и додаде дека “не е можно да се гради нов почеток со стари кадри“.
Во рамки на кампањата за внатрепартиските избори, пред присустните членови на битолската СДСМ на 27 јуни се претставија двајца од четворицата кандидати, Венко Филипче и Александар Бајдевски.
Филипче, кампањата ја оцени како фер и демократска и дека очекува да се заокружи овој процес со легитимен избор на новиот претседател.
-Идниот претседател на СДСМ ќе има целосен легитимитет затоа што го црпи од членовите. СДСМ е демократска партија која уште еднаш тоа го потврдува преку организирање на внатрепартиски непосредни избори. Преку 23 илјади гласачи во недела ќе може да изберат кој сакаат да ја води партијата и ги повикувам масовно да го сторат тоа, изјави Филипче презентирајќи ја својата програма пред членовите.
Тој уште еднаш се осврна на обединувањето како предуслов за успешно закрепнување на СДСМ и спречување на натамошни поделби.
Според Бајдевски причините за поразот на двојните избори, ги дела на два дела, перцепцијата за евроинтеграциите и коалициониот партнер на тогашната влада. Смета дека имале несоодветна кадровска понуда на последните избори и дека требало да биде подобра.
-Се чувствувам и должен во овој момент кога на партијата и е најтешко, да покажам храброст и да излезам со одредена програма пред членовите и да ја побарам нивната поддршка и заедно ја вратиме партијата онаму каде што и е местото, онаму каде заслужува. Мојата програма е сеопфатна, во истата има неколку елементи на кои што обврнувам внимание. Првата точка е идеологијата, за мене многу важна, давам големо значење на организациската поставеност на партијата, општественото делување на социјалдемократскиот сојуз во наредниот период, коалициониот капацитет и нормално меѓународната соработка, порача Бајдевски.
Избирачкиот список ќе брои вкупно 23.373 акредитирани членови на СДСМ.
Досега, на чело на партијата беа Бранко Црвенковски, Владо Бучковски, Радмила Шекеринска, Зоран Заев и Димитар Ковачевски
