Општина Ѓорче Петров и Црвениот крст со акција за делење флаширана вода во централниот парк

Општина Ѓорче Петров и волонтери од Црвениот крст во паркот во Ѓорче Петров спроведоа акција за делење флаширана вода за граѓаните, поради високите температури што ја зафатија земјата, информираат од Општина Ѓорче Петров.

-Високите температури се опасни по здравјето на сите граѓани, особено на повозрасните. Наш мал придонес во борба со црвениот температурен аларм е акцијата која ја спроведовме со Црвениот крст за бесплатно делење шишиња со вода во паркот во Ѓорче Петров, истакнал градоначалникот Александар Стојкоски, кој присуствувал на терен со волонтерите.

Тој истакнал дека волонтери на Црвениот крст и деновиве ќе се движат низ Ѓорче Петров со цел да им се понуди помош на граѓаните.

-Препораките од Владата се јасни, апелирам да се сфатат сериозно и да се почитуваат. Пијте многу течности, особено вода и излегувајте само по потреба, и не во часовите меѓу 11 и 17 часот. Ние како одговорна локална самоуправа и натаму ќе ја следиме состојбата со високите температури и ќе делуваме по потреба, посочил градоначалникот на општина Ѓорче Петров Стојкоски