Стипендии за докторски и постдокторски студии и истражувања во Швајцарија за академската 2025/2026
Амбасадата на Швајцарија во Скопје известува дека Сојузната комисија за стипендии за странски студенти на Владата на Швајцарија ќе додели од 10 до 15 стипендии за студенти од државите во Централна и Источна Европа и од Кавказ за академската 2025-2026 година.
Министерството за образование и наука објави дека стипендиите се наменети за млади, висококвалификувани дипломирани студенти од сите области, со можност тие да го продолжат школувањето на докторски и постдокторски студии на некои од државните универзитети или признати институции во Швајцарија (швајцарските кантонални универзитети, универзитетите за применети науки, двата федерални института за технологија и четирите институти за истражување).
Достапни се три вида стипендии: истражувачки стипендии; докторски стипендии; постдокторски стипендии. Понудата не вклучува стипендии за додипломски и магистерски студии.
Подетални информации за трите вида стипендии, важечки за македонските студенти, може да се најдат на линкот на Амбасадата на Швајцарија: www.eda.admin.ch/north-macedonia
Апликациите и останатите потребни документи може да се добијат во Амбасадата или електронски (тел: 02 3103300; e-mail: skopje@eda.admin.ch).
-Целосно пополнетата апликација во хартиена форма во два примерока (еден оригинал и една копија) кандидатите треба да ја достават до Амбасадата на Швајцарија во Скопје, најдоцна до 10 ноември 2024 година, наведено е во известувањето на веб-страницата на МОН.
