Македонски спортски риболовци од клубот Вардар најдобри на Балканот

За првпат во историјата на спортскиот крапски риболов една македонска екипа освои прво место на Балканско првенство (БП).

Станува збор за Балканијадата одржана неодамна на езерото „Мавровица“, кај Свети Николе.

- Освен од Македонија, како домаќин, учествуваа и натпреварувачки екипи од Србија, Словенија, Бугарија и од Албанија. Се работи за успешна завршница на 15-от Јадранско-подунавски куп, каде што во лоши временски услови и неизвесна борба докрај, победи екипата на СО2 од ЗСРРК Вардар од Скопје, на чело со капитенот Јован Миловски и натпреварувачите Александар Миловски и Мирослав Савиќ. Второто место ѝ припадна на екипата Тим Моџо од Бугарија, а третото го освои УСР Шаран од Кикинда (Србија). На оваа екипа ѝ припадна и пехарот за најголема уловена риба, соопшти Македонската риболовна федерација.

Учесниците и натпреварувачите, како и сите оние што беа логистика имаа само пофални зборови за одлично организираниот натпревар, како и за вкупната организација.