Во Делчево одбележан Денот на македонската револуционерна борба

Со пригодна свеченост во организација на Општина Делчево денеска се чествуваше Денот на македонската револуционерна борба, 23 Октомври. По тој повод, за значењето на овој празник, членовите од КУД „Гоце Делчев“ од Делчево подготвија пригоден реферат, а пред споменикот на Гоце Делчев во центарот на градот, се поклонија и букети цвеќе положија делегација од Општина Делчево, како и претставници од институции, политички партии и здруженија на граѓани.

-23 Октомври во историјата е запишан како ден на основањето на Македонската револуционерна организација. Согласно со историските податоци, на 23 октомври 1893 година во Солун се поставуваат основите на организацијата којашто ќе стане симбол на борбите на Македонците за слобода. Основоположниците биле: Христо Татарчев, Даме Груев, Петар Поп Арсов, Иван Хаџи Николов, Антон Димитров и Христо Батанџиев. Тие основаат конспиративна група, нарекувајќи ја Македонски револуционерен комитет, истакнаа во рефератот младите членови на КУД ,,Гоце Делчев".

Организацијата, како што додадоа, се борела за ослободување на Македонија со сопствени сили, без помош од надвор. Формирањето на МРО значело почеток на организираното македонско револуционерно движење кое преку Илинден 1903 г., а потоа преку НОБ резултира со создавање современа самостојна македонска држава.

Претходно одбележување по повод Денот на македонската револуционерна борба организираше и Општинскиот комитет на ВМРО - ДПМНЕ Делчево. На настанот пред споменикот на вликанот Делчев присуствуваше и пратеникот Драган Ковачки, а во рамки на истиот исто така беше подготвен реферат за значењето на празникот.