Свечена прослава по повод 30-годишнината од основањето на Македонското библиско здружение

Свечена прослава по повод 30-годишнината од основањето на Македонското библиско здружение се одржа денеска во Скопје.

На свеченоста, со пригоден говор се обрати Неговото Блаженство, Архиепископот Охридски и Македонски г.г. Стефан, кој, помеѓу останатото, посочи дека „главната причина за нашата и, воопшто, сехристијанската љубов кон Библијата не е тоа што таа е најзначајната книга во историјата, ниту, пак, е длабочината на нејзината мисла и силата, богатството и убавината на нејзината содржина. Библијата секако е сето тоа, но таа не е и самотоа, односно не е првенствено тоа! Имено, она што ја прави незаменлива, е тоа што во неа и прекунеа говори самиот Бог, со зборови и мисли искажани и напишани од боговдахновени и праведни мажи – пророци и апостоли“, информираат од Скопската епархија на МПЦ-ОА.

Со промотивен говор за новообјавените преводи на Новиот завет и на псалмите се обрати Неговото Преосвештенство, Епископот Хераклејски г. Климент, кој, меѓу другото, истакна дека „преведувањето и објавувањето на сакралните текстови низ историјата, покрај својата неопходност и подразбирливост, воедно, се покажало како особено комплексна и напорна дејност. Креативниот набој да се пренесе смислата токму на непреводливото, да се воспостави жива комуникација помеѓу читателот и духот на текстот, всушност, претставува непрекинат предизвик за јазикот, предизвик што ја провоцира творечката умешност и енергија на преведувачот…“

Како претставник од Обединетите библиски здруженија, пак, поздравно слово имаше Џорџ Сохос, а, на самиот крај, завршно, благодарствено обраќање имаше и генералниот секретар на Библиското здружение Ѓоко Ѓорѓевски. Чествувањето беше проследено со музички изведби на разни инструменти, со поетско читање на псалми, како и со приказ на краток исечок од неодамна снимениот документарен филм за дејноста и за мисијата на Македонското библиско здружение.