Министерство за енергетика: Распределбата на ваучери се одвива според предвидената динамика

Министерството за енергетика, рударство и минерални суровини ја оценува дека успешно се реализира процесот на доделување на ваучери за купување инвертер клими и оти нивната распределба се одвива согласно предвидената динамика.

-Во текот на вчерашниот ден во Центрите за вработување низ државата поделени се над 90 проценти од вредносните ваучери, а во Скопје и Битола каде што доделувањето беше во СЦ „Борис Трајковски“, односно спортска сала „Боро Чурлески“ беа поделени 79 и 64 отсто од предвидените ваучери. Со оглед на бројноста на добитниците на вредносни ваучери од овие два града, како и во Прилеп (во Центарот за вработување) доделувањето на ваучерите е на истите локации и денеска. Во моментов на трите локации нема редици и процесот тече во добар ред согласно предвидената динамика, велат од Министерството.

Оттаму ги известуваат сите сите оние кои се уште ги немаат подигнато своите ваучери дека тоа можат да го сторат од понеделник, па до крај на месец ноември, во просториите на Министерството кое се наоѓа на почетокот на улица „Македонија“ спроти Музеј на Град Скопје.

Министерството, додаваат оттаму, останува достапно за сите дополнителни прашања, при што потсетуваат дека редовни информации за тековните активности се објавуваат на нивната веб-страница и преку отворени телефонски линии.