Авторски концерт на Владимир Николов и Националниот Џез оркестар во Велес
На 23-ти ноември идната сабота во 20:00 часот, во театарот „Јордан Хаџи Константинов-Џинот” во Велес ќе се одржи авторски концерт на македонскиот композитор и диригент Владимир Николов и Националниот Џез оркестар. На концертот ќе бидат изведени одбрани композиции од неговиот богат творечки опус, меѓу нив и неколку светски и македонски премиери. Ова е воедно и прв негов целовечерен авторски концерт со овој оркестар. насловен „Crossover Stories” кој вклучува композиции од различни периоди во изминатите 22 години авторска дејност.
Владимир Николов е композитор чие творештво опфаќа широк спектар на изразни средства и жанри, користејќи ги искуствата во класичната музика и џезот како точка на поаѓање. Веќе подолго време е „задсцената" во улога на аранжер во светски оркестарски проекти, но честопати настапува и како диригент со реномирани солисти и ансамбли.
Како редовен аранжер на еден од најдобрите ревиски оркестри во светот – Метропол Оркест, соработувал со врвни имиња како Џон Клејтон, Ренди Брекер, Винс Мендоза, Џулс Бакли и Џејкоб Колиер.
Како автор и бенд лидер има издадено три студиски албума со ансамблот Николов-Ивановиќ Ундектет.
Угледниот магазин Jazz Times овој ансамбл го оценува како „извонреден,еден од моментално најкреативните големи џез ансамбли во Европа”, а Downbeat музиката на овој ансамбл ја оценува како „ритмички сложенa, хармонски е вокативнa, беспрекорно аранжиранa”.
Овие квалитети прострујуваат и во неговата музика за Биг Бенд оркестар која соединува различни стилови во еден органски сублимат.За своите композиции и аранжмани за Биг Бенд е добитник на бројни награди и признанија.
