Неправилности во ресторан сопственост на Трамп

Инспектори за храна откриле неправилности во ресторан на Трамп

Инспектори открија 13 нарушувања на нормите за безбедност на храната во ресторан на луксузниот приватен клуб во туристичкиот комплекс Мар-а-Лаго на Флорида, во сопственост на американскиот претседател Доналд Трамп.

Весникот „Мајами хералд“ комплексот Мар-а-Лаго го нарекува „јужната Бела куќа“. Трамп го купил во 1985 година и често пати таму ги поминува викендите. Тој и овој викенд ќе го мине во Мар-а-Лаго.

Меѓу најсериозните нарушувања, утврдени при инспекцијата на 26 јануари е чување на сурова риба и месо на повисоки температури од предвидените, рѓосани полици и работење на вработените во кујната без готварски шапки.

Две недели по инспекцијата претседателот го прими во истиот клуб јапонскиот премиер Шинѕо Абе, а минатата недела гостин му беше кинескиот претседател Си Џингпин. Првичниот износ за членство во клубот е 200 илјади долари.

– Овие нарушувања биле откриени при рутинска инспекција, а не по претходно поднесена тужба. Тие беа отстранети и објектот веднаш ги исполни барањата на инспекторите, изјави претставник на властите на сојузната држава Флорида.