Пјонгјанг: Новата ракетна проба беше предупредување кон САД

Северна Кореја соопшти денеска дека нејзиното последно тестирање на интерконтинентална балистичка ракета, извршено во петокот навечер е остро предупредување до САД поради нивната желба да наметнат нови санкции на Пјонгјанг, се наведува во соопштение на севернокорејска новинска агенција КЦТА. Северна Кореја уверува дека ќе одговори во случај на воена провокација од страна на Вашингтон.

– Тестот на интерконтиненталната балистичка ракета овој пат беше со цел да се испрати остра порака на САД, кои зачестија со несовесни изјави, кои френетично ја шират заканата со санкции и кои водат кампања која има за цел да изврши притисок врз Корејската народнодемократсла република, се вели во веста на КЦТА, пренесува БТА.

Според експерти, пробата од петокот беше очигледно беше помоќна од онаа на 4 јули. Тие сметаат дека севернокорејските ракети сега можат теоретски да достигнат до источниот брег на САД, вклучувајќи го и Њујорк.

Ракетната проба на 4 јули предизвика бран од меѓународна загриженост во врска со воените способности на оваа земја. Оттогаш САД вршат притисок за наметнување на санкции од страна на ОН и на американскиот Конгрес против Пјонгјанг.

Минатата недела нови казнени мерки против Северна Кореја беа изгласани во Сенатот на Конгресот.

Во соопштението на севернокорејското Министерство за надворешни работи, пак, се апелира до САД да стави крај на „глупавата фантазија” дека може да наштети на Северна Кореја.

„Ако јенките се осмелат повторно да ја донесат нуклеарната закана над оваа земја, тогаш Северна Кореја ќе ги научи на манири, и ќе им покажеме како стратешки се користи нуклеарна сила”, се вели во соопштението на Министерството за надворешни работи.