Сенатот го именуваше Марк Грин за директор на УСАИД

Американскиот Сенат го именуваше поранешниот конгресмен Марк Грин за директор на Американската агенција за меѓународен развој (УСАИД) на предлог на претседателот Доналд Трамп.

„Грин на нашата организација ќе ѝ помогне да ги постави приоритети во идните развојни инвестиции на Америка, да го осигури секој долар од даночните обврзници, да ја унапреди сигурноста и просперитетот на нашата земја и да нè приближи до денот кога странската помош нема да биде потребна“, стои во соопштението на УСАИД.

Грин е републиканец од Висконсин, кој беше дел од Претставничкиот дом од 1999 до 2007 година, а работел и како амбасадор во Танзанија и бил претседател на Меѓународниот републикански институт.

Тој доаѓа на чело на агенцијата во момент кога американската администрација предлага намалување на помошта што САД ја даваат на други земји и нејзина реорганизација.