Пластичниот отпад се заканува на флората и фауната во Средоземното Море

Група нуркачи влегоа во длабочините на морето во близина на градот Хатај во Турција за да привлечат внимание кон загадувањето со пластика, што сериозно се заканува на животната средина и на морски суштества во Средоземното Море, пишува Анадолија.

Камерманот сними многу интересни детали, па во морските длабочини можат да се видат разни предмети од стакло и пластични шишиња, пластични кеси, вилушки и лименки.

Махмут Игде, експерт за животна средина од турскиот Универзитет Искендерун, изјави дека ја организирале оваа кампања за да укажат на опасностите што ги создава пластичниот отпад во морињата и со надеж дека граѓаните ќе се однесуваат поодговорно и ќе ја заштитат животната средина.

Тој додаде дека редовно, веќе 15 години, нурка во водите на Средоземното Море, истакнувајќи дека зачувувањето на морскиот живот е многу важно за иднината на самите луѓе.

– Морињата се нешто што ќе го оставиме и на нашите деца, а ние мораме да дејствуваме веднаш, за морињата да ги оставиме во во здрав облик на идните генерации. Затоа, гласно порачуваме: Не на пластиката!, вели Игде.

На крајот, тој предупреди дека секоја година во морињата завршуваат тони пластика, која е фатална за животот на морските суштества, додавајќи дека пластичниот отпад негативно влијае и врз животот на луѓето.