Околу 15.000 литри млеко замрза на улица во германски град

Илјадници литри млеко замрзнаа на улица во германската провинција Северна Рајна-Вестфалија, објави ДПА.

Непознати сторители минатата ноќ истуриле млеко од паркиран камионски танкер, соопшти денеска полицијата.

Возачот го паркирал камионот – цистерна во градот Рутен, во областа Зост, за да собере уште млеко од соседните фарми. Кога се вратил, околу 15.000 литри млеко било истурено на патот и замрзнато на температура од околу минус четири степени.

Млекото формираше лизгава површина по целата ширина на коловозот, соопшти противпожарната бригада.

Персонал од 20 лица го исчистија млекото од патот со помош на сол и вода.