Саломе Зурабишвили ја презеде функцијата претседател на Грузија

Саломе Зурабишвили (66) положи заклетва со што и официјално ја презеде функцијата претседател на Грузија.

Церемонијата за преземање на функцијата шеф на државата, која беше емитувана директно на неколку телевизии во земјата, се одржа во кралскиот комплекс „Батонис“, поранешна резиденција на кралот Ираклиј Втори (1720-1798).

На церемонијата присуствуваа 1.800 домашни и странски гости, меѓу кои и делегации од 55 земји.

Церемонијата се одржа во присуство на властите на земјата, претставници на опозицијата и свештенството.

На 28 ноември во Грузија се одржа вториот круг од претседателските избори, во кој учествуваа независните кандидати Саломе Зурабишвили, поддржана од владејачката партија Грузиски сон и Григор Вашадзе, поддржан од главната опозициска партија Обединетото национално движење.

Саломе Зурабишвили освои 59,52 проценти од гласовите.