Портланд поведе против Денвер по маратон со 4 продолженија (видео)
Портланд Трејлблејзерс победи по 4 продолженија со 140:137 против Денвер Нагетс во третиот натпревар од полуфиналето во Западната конференција на НБА. На овој начин, „пионерите“ поведоа со 2: 1 во серијата во која се игра до 4 победи во 7 натпревари.
Средбата во „Мода Центар“ се претвори во вистински кошаркарски маратон и стана најдолгата плејоф таква од 1953 година наваму, кога Бостон Селтикс и Сиракјуз Нешнлс, исто така, играат четири дополнителни периоди.
И двата тима имаа еден куп можности да го освојат натпреварот како во регуларното време, така и во продолженијата, но промашувањата во самиот крај на периодите им попречи за тоа. Решителен за крајниот исход се покажа пропустот на центарот на гостите, Никола Јокиќ, кој на помалку од 6 секунди пред крајот на четвртото продолжение промаши слободно фрлање.
Неуспехот сепак во голема мера се должеше и на крајната истоштеност на Србинот, кој одигра рекордни за кошаркар со раст над 210 сантиметри 64:58 минути од можни 68.
Најпрецизен за победниците од Портланд во натпреварот беше Си Џеј Мекалум кој нанижа 41. Уште 28 реализира Демијан Лилард, а Родни Худ се вклучи многу силно во последниот дополнителен период и заврши со 19 поени.
За Денвер, Џамал Мареј постигна 34 поени, а Јокиќ го постигна својот трет „трипл-дабл“ во плејофот со 33 поени, 18 скокови и 14 асистенции. Со 22 поени остана Вил Бартон.
Јанис Адетокумбо пак го одигра најсилниот натпревар во полуфиналето на Источната конференција досега во сезоната, а тоа се покажа доволно за вториот последователен успех на Милвоки против Бостон. Бакс освоија на гостувањето кај Селтикс со 123:116 и така веќе имаат предност од 2-1 во победи во вториот круг на плејоф, кој стигна до целосен пресврт откако го изгубија првиот дуел на домашен терен.
Грчкото крило, кој се смета како еден од главните кандидати за наградата „МВП“ на сезоната, остана на две асистенции од „трипл-дабл“, откако за 39 минути во „Ти Ди Гарден“ беше над сите. Адетокумбо постигна 32 поени, пропуштајќи само пет шута на натпреварот – 8/12 за 2 поени и 0/1 од тројка. 24-годишниот Европеец беше запиран само по цената на прекршоци од противничките кошаркари, а тоа доведе до цели 18 слободни фрлања, од кои тој постигна 13. Јанис совлада и 13 скока, ги блокираше 3 пати шутевите на своите противници и одзеде 2 топки.
Џорџ Хил помогна со 21 поен како резерва, Крис Мидлтон постигна 20, а Никола Миротиќ остана со 13 поени. Клучен за втората победа на тимот од државата Висконсин беше третата четвртина во која кошаркарите на Мајк Баденхолзер постигнаа 40 поени и сеодвоија во резултатот, а Бостон и така не успеа да ја избрише негативата во завршните 12 минути.
Кајри Ирвинг со 29 поени и Џејсон Тејтум со 20 поени и 11 скока беа двајцата најдобри играчи на домаќините.
Мечот започна со минута молчење во спомен на легендата на клубот на домаќините Џон Хавличек, кој почина по борбата со Паркинсонова болест претходно овој месец. Келтите, исто така, излегоа со специјални дресови посветени на Хавличек.
