Претседателот на Литванија Гитан Наусед положи заклетва во Парламентот

Новоизбраниот претседател на Литванија, Гитан Наусед денеска положи свечена заклетва во Парламентот.

Наусед во својот говор ја истакна потребата за зачувување на стратегискиот курс на земјата кон посилна евроатланска интеграција и тесни врски со ЕУ и САД.

Тој истакна дека во надворешната политика Литванија останува доверлив партнер „кој ќе се потпира на вредностите и нормите на меѓународното право“.

– Неопходно е да ги развиваме билатералните односи со соседните Полска, Латвија и Естонија и заедно да се стремиме кон енергетска независност и да ги браниме нашите интереси во ЕУ и во НАТО, истакна Наусед.

Насуд, кој беше избран на претседателската функција кон крајот на мај, повеќе години беше советник на претседателот на една од најголемите комерцијални банки во Литванија.

Педесет и петгодишниот банкар, кој ќе ја предводи Литванија во наредните пет години, е познат по своите коментари и аналитички написи во медиумите за економски прашања.