Шефот на кабинетот на Меркел тврди дека таа е добро и планира да го отслужи целиот мандат

Здравјето на канцеларката Ангела Меркел е добро и планира да го отслужи целиот мандат до 2021 година во коалиција со сојузниците од Социјалдемократската партија, изјави денеска шефот на нејзиниот кабинет Хелге Браун.

Меркел, која наполни 65 години, последните недели неколку пати се тресеше на јавни церемонии, што предизвика шпекулации за нејзината здравствена состојба, а таа инсистираше на тоа дека е добро.

Браун рече дека здравјето на канцеларката е добро и оти е способна да го одработи целиот мандат, до сојузните избори закажани за 21 октомври 2021 година.

Поради состојбата на Меркел на неколку церемонии, јавноста почна да се прашува дали социјалдемократите ќе се повлечат од владејачката коалиција, која многу членови на партијата сакаат да ја напуштат.

Браун сепак очекува социјалдемократите да останат во коалиција со конзервативниот блок на Ангела Меркел, Христијанско-демократската унија.

Тој рече дека не верува оти Социјалдемократската партија ќе сврти грб во момент кога германската Влада мора да се позанимава со Брегзит и да помогне во обликувањето на европската иднина кога следната година ќе го преземе претседавањето со Европската унија.