Современа македонска фотографија на фестивалот „Фотори“ во Ријека

Во рамките на десеттото јубилејно издание на фестивалот на фотографија „Фотори“ што се одржува во Ријека вечерва пред хрватската публика ќе биде претставена современата македонска фотографија со три изложби: „Актуелен момент во македонската фотографија“ која е избор на дела на триесетина македонски современи автори, изложба на Боро Рудиќ и на Кирил Штрков, соопшти Фото сојуз Македонија.

Сите три колекции ќе бидат изложени во просториите на „Државниот архив на Ријека“.

– „Фотори“ е Ријечки фестивал на фотографијата во организација на Фото клуб Ријека, во чиј оквир се одвиваат низа збиднувања од областа на фотографијата како предавања, изложби, работилници, средби со автори и фотографска литература, демонстрација на фотографска опрема и прибор итн. Сите заинтерсирани на кои фотографијата им е професионално определување, или пак хоби можат да земат учество и нема никакви ограничувања во поглед на возраста, се наведува во соопштението од Фото сојуз.

Идеен и духовен лидер на манифестацијата е Борислав Божиќ.