„Медена земја” прикажан во кино салите во Крива Паланка и Кратово

Годинашниот македонски кандидат за најпрестижната филмска награда „Оскар”, документарецот „Медена земја” вечерва беше прикажан во кино-салите во Крива Паланка и Кратово.

Најнаградуваниот македонски документарец, што со победа во три категории на почетокот на годинава триумфираше на престижниот филмски фестивал „Санденс“, „Медена земја“ (Honeyland), и е во трка за најдобар документарец на Европските филмски награди, вечерва во деветнаесет часот беше проектиран пред Кривопаланечката публика, додека прикажувањето за љубителите на филмската уметност од Кратово беше во дваесет часот, во Мултимедијалниот центар.

Филмот е атрактивна приказна за правилото за баланс со природата по кое се води главната хероина, Атиџе, последната жена-одгледувач на диви пчели во Европа, која живее сама со својата мајка во централна Македонија. Но, кога во нејзиното соседство ќе се досели номадско семејство-пчелари, таа се соочува со сериозен предизвик, да ги спаси пчелите и да ја зачува природната рамнотежа на земјата.

Филмот на режисерите Љубо Стефанов и Тамара Котевска ја носи пораката:„Ако еден го прекрши правилото, сите ја плаќаат цената”.