Почна седмиот меѓународен театарски фестивал во Тетово

Со изведба на претставата „Жива сфинга“ на Националниот театар од Косово синоќа беше отворем Меѓународниот театарски фестивал во Тетово. Фестивалот за отворен го прогласи министерот за култура Хусни Исмаили.

– Драмата „Жива сфинга“ е претстава според текст на Реџеп Ќосја со ист наслов, а сега во режија на Блерта Рустеми Неризај. Првичниот текст е напишан во 70-тите години и зборува за крвна одмазда и апсурдни братства на времето, додека сегашната „Жива сфинга“ ја разоткрива табу-повоената драма на Косово и „мистериозните“ политички убиства на некои интелектуалци, новинари и политичари.Во главните улоги во претставата се Фатмир Спахиу, Адријан Морина, Едона Решитај, Арменд Смајли, Илбер Барди, Шпетим Кастрати и Дукаѓин Подримај, информираат организаторите од Тетовски театар.

Вечер фестивалот продолжува со „Странци“ на Драмски театар од Скопје од 20 часот која ќе се изведува на македонски јазик. „Странци“ е по текст на Паоло Ѓеновезе, а во режија на Нела Витошевиќ. Во главните улоги настапуваат Игор Ангелов, Ирена Ристиќ, Биљана Драгиќевиќ – Пројковска, Зоран Љутков, Сања Арсовска, Филип Трајковиќ и Предраг Павловски.

Домаќините од Тетовски театар настапуваат во недела со првата реприза на „Едно изгубено писмо“.