Во Крива Паланка промовирана драмата ,,Брачниот живот на Зона Замфирова “од Трајче Кацаров

Во локалната установа Градски музеј, Крива Паланка денеска беше промовирана драмата „Брачниот живот на Зона Замфирова“ од Трајче Кацаров, како придружна активност од програмата на 11-от Интернационален фолклорен фестивал “св.Јоаким Осоговски”.

Промотор беше Мишел Павловски, а секвенци од книгата интерпретираа актерите Благоја Чоревски и Страшко Милошевски.

-Кацаров го гради текстот лукави и мајсторски, воведувајќи сцени кои ја интригираат публиката, истовремено давајќи му слобода на режисерот, а воедно, пренесува пораки и актуелни состојби од општеството. Гради комедија напати гротескна, по малку саркастична, а хуморот силен, не и вулгарен. Оваа книга е нагласена театрална пиеса која ќе живее во театрите долги години, рече Павловски.

Кацаров е автор и театарски критичар, неговите дела се преведени и на неколку јазици – англиски, руски, украински, албански, бугарски, српски, хрватски и словенечки, a неговите театарски пиеси се одиграни низ повеќе театри во регеионот.

-Сметам дека не можам да бидам драмски писател, бидејќи за тоа е потребно мајсторство, зашто драмата претставува, а јас ремарките ги пишувам како есеи. Кај нас и многу малку се чита, драмските дела имаат литерарна вредност, затоа треба да се чита, инсценацијата е различна од напишаното.Се надевам дека ова ќе биде текст близок до читателите, рече авторот Кацаров.