МЗТ Скопје со гостински триумф поведе во полуфиналната серија против Пелистер

Екипата на МЗТ Скопје Аеродром направи голем чекор кон пласман во финалната серија за титулата во македонското кошаркарско првенство, откако попладнево триумфираше на гостувањето во Битола против Пелистер со 79:72.

Почетокот на мечот навестуваше поинаков исход по водството на Пелистер од 14:0 и 36:20 по 16 минути игра.

Сепак, МЗТ Скопје се врати резултатски во натпреварот и дојде до израмнување 51:51 на истекот на третата четвртина, а триумфот го обезбеди во последниот период што го реши во своја корист со 24:13.

Вториот натпревар во серијата до две победи се игра на теренот на МЗТ Скопје, в петок.