Евролига утре ќе одлучи во која држава ќе играат клубовите од Русија

Раководството на кошаркарската Евролигата утре ќе објави алтернативна земја во која ќе играат руските клубови, пренесува „ТАСС“ повикувајќи се на прес-службата на Евролигата.

– Утре ќе има состанок на Бордот на акционери на Евролигата, на кој ќе се разговара за темата за одржување на претстојните натпревари на руските тимови, а се очекува да биде објавена и алтернативна земја во која ќе се играат натпреварите на тимовите од Русија, соопшти прес-службата на елитното кошаркарско натпреварување

Претходно беше одложен натпреварот од 26. коло од регуларниот дел од сезоната во Евролигата меѓу руска ЦСКА и шпанска Барселона. Средбата требаше да се одржи на 27 февруари во Москва.

Евролигата ги одложи и натпреварите Баерн (Германија) – ЦСКА, Басконија (Шпанија) – Уникс (двата на 24 февруари) и Зенит – Барселона (25 февруари).