„Патриот 2016″ од Делчево шампион во конкуренцијата за кошаркарки до 16 години

Екипата на „Патриот 2016″ од Делчево ја освои шампионска титула во М-16 кошаркарската лига на Македонија. Екипата од Делчево која викендов беше организатор на завршниот Ф4 турнир, во финалето триумфираше над Тим Арена од Штип со 57-69, со што ги освои златните медали во конкуренцијата за кошаркарки до 16 години за сезоната 2021/2022.

Капитенот на клубот од Делчево, репрезентативката Ана Ангеловска го освои признанието за најкорисен играч со дабл-дабл ефект од 42 поена и 14 скокови предводејки ги своите соиграчки до победата.

Во изјава по завршувањето на натпреварот Ангеловска рече дека целиот тим е пресреќен, а победата, како што додаде е резултат на макотрпната работа на екипата. Тренерот Љупчо Петровски не криејќи го задоволството потенцираше дека победата која е 16 по ред на екипата и ја донесе шампионската титула, додека спонзорот на екипата Александар Дончевски, потенцираше дека медалот не е важен толку, колку што е важно што повеќе од 30 години тренирајки млади деца, Петровски успева да ги оттргне младите од пороците на денешницата, што е најголем успех за него како спортски тренер.

Честитки до тимот упати и градоначалникот на Делчево, Горан Трајковаки кој најави понатамошна поддршка од страна на општината за спортистите.

Претходно, во натпреварот за трето место славеа Вардарки над кошаркарките од Бадел 1862 со 62-84.