Промовирани две книги од Лила Тодоровска во Крива Паланка
Во библиотеката „Кочо Рацин“ на Националната установа Центар за култура Крива Паланка беа промовирани две книги со песни од поетесата Лила Тодоровска.
Тодоровска е членка на литературниот клуб на поети и читатели „Калин“ кој работи во рамки на оваа установа.
Рецензент на книгите со осврт на песните од „Валавица” беше роднокрајната авторка Оливера Станковска.
– Иако се песните поместени во книга што за првпат се печати, како книжевно првенче на Тодоровска, изобилството од емоции, тага,болка, осаменост, разочарување, па преку разните циклуси: надеж, светлина и искри на нова, поинаква животна радост – љубов кон потомството, ја вбројува во редот на авторки кои говорат од срце за расположението на срцето и душата. Песните една по друга ни носат многу чувствителни моменти од нејзините : детство, младост, зрелост, рече Станковска.
Тодоровска во нејзината втора стихозбирка „Бабините булки” ги опева по име и со бројни епитети и украсни фигури нејзините пет внуки и внуци, на кои им ја посветила книгата, а тие самите ги прочитаа песните кои го носат нивното име.
Лила Тодоровска е и текстописец на детски песнички, а годинава освои втора награда од жирито и публиката на фестивалот „Радика фест 2022″.
