Одржан првиот концерт во рамки на Делчевското културно лето

Со промоција на албумот „Здивот на вечната љубов” од Билјана Петровска синоќа во Делчево беше отворено годинашното „Делчевско културно лето“. Концертот го организираше Центарот за култура „Никола Јонков Вапцаров“ и е прв од низата концерти во рамки на оваа манифестација.

– Албумот е авторски и имаше онлајн промоција на 3 јуни годинава. Исто така сакам да кажам дека албумот е инспириран од македонската народна песна прикажан во современи техники на работа, малку излезен од класичните норми, истакна Билјана Петровска.

Освен Петровска, која настапи на пијано, на промоцијата настапија и Марија Јакимовска на флејта, Петар Колевски на кларинет и Владимир Крстев на виолина.

Од Центарот за култура го најавија и вториот концерт во рамки на Делчевското културно лето.

– Веќе во петок можам да најавам дека повторно имаме концерт. Ја повикувам публиката да дојде како и денес да го проследи настапот на групата Нонет, изјави директорот на Центарот за култура, Методи Толевски.

Делчевско културно лето се реализира со поддршка од Министерството за култура.