Промовирана антологијата „Музика, секогаш и уште“

Tематската антологија „Музика, секогаш и уште (поезијата во дијалог со музиката)“, беше промовирана во рамки на „Струшките вечери на поезијата“, во Центарот за култура „Браќа Миладиновсци“ во Струга.

Антологијата содржи 250 песни од македонски и странски поети, а сите ги обединува врската со музиката.

Како што информираат од тимот книгата ја приредил македонскиот поет, раскажувач, есеист, теоретичар и преведувач Владимир Мартиновски.

– Историјатот на фестивалот „Струшките вечери на поезијата“, чијашто химна, патем кажано, е токму „Т’га за југ“ е силно сведоштво дека и во современата (македонска и светска) поезија музиката останува неразделна од поетскиот чин. Песните на венценосците Окуџава, Ајги и Алберти, Енцесбергер, Адонис и Загајевски, Морехон, Атвуд и Ен Дафи, Сенгор, Конески и Гинзберг, Матевски, Пачеко и Ко Ун, Мервин, Симиќ и Ор, Левчев, Павловиќ и Транстромер, сè до поезијата на годинешниот лауреат Шунтаро Таникава, се најдобра поткрепа за аксиомата дека поезијата и музиката се „неразделни уметности“, истакнал приредувачот Мартиновски.

Антологијата е приредена специјално за 61. издание на „Струшките вечери на поезијата“, кои годинава се одржуваат под мотото „Ритамот на стихот, ритамот на животот“.