Ноле го собори рекордот на Федерер за бројот на грен-слем полуфиналиња

Србинот Новак Ѓоковиќ со триумфот над американскиот тенисер Тејлор Фриц со 3-0 во сетови (6-1, 6-4, 6-4) по 13. пат се пласираше во полуфиналето на УС Опен, а по 47. пат на грен-слем турнирите со што го надмина досегашниот рекордер Роџер Федерер од Швајцарија.

Четвртфиналето беше осми меѓусебен дуел меѓу 35-годишниот српски тенисер и 25-годишниот Американец, а Фриц и натаму е без победа и остана на двата сетови освоени во нивната пресметка во 3. коло на Австралија опен 2021.

Ѓоковиќ во полуфиналето ќе игра против уште еден домашен тенисер, а тоа ќе биде 20-годишниот Бен Шелтон, рангиран на 47 место на АТП листата.

Шелтон рано утрово во четвртфиналето беше поуспешен од сонародникот Френсис Тијафо со 3-1 во сетови (6-2, 3-6, 7-6, 6-2).