Ѓорческа запрена во полуфиналето во Ираклион

– Македонска тенисерка Лина Ѓорческа не успеа да се пласира во финалето на фјучерсот во грчкиот град Ираклион, откако денеска ја загуби полуфиналната пресметка со Екатерина Макараова од Русија со 2-0 во сетови (7-6, 6-3).

Првиот сет беше одлучен во тајбрејк во кој Ѓорческа имаше водство од 4:2 и 5:3, но руската тенисерка со минисерија дојде до сет топка по водството од 6:5. Ѓорческа спаси две сет топки, но Макарова тајбрејкот го заврши со 10:8 на поени.

Во вториот сет македонската тенисерка поведе со 1:0, но противничката повторно влезе во серија и поведе со 5:1, што беше недостижно за македонската тенисерка резултатски да се врати во натпреварот кој траеше еден час и 53 минути.

За пласманот во полуфиналето македонската тенисерка освои 25 поени и за очекување е на новото рангирање да има подобрување на својата позиција на ВТА листата.

По една недела пауза Ѓорческа треба да настапи на фјучерсот во Валенсија од 20. ноември што ќе се игра за награден фонд од 100.000 долари.