Аларм во Манчестер Сити: Остануваат без важен играч пред мечот со Реал?
На почетокот на неделата беше под знак прашалник дали Манчестер Сити ќе може да смета на Ерлинг Халанд за првиот четвртфинален натпревар од Лигата на шампионите против Реал Мадрид, а кога стана јасно дека Норвежанецот е подготвен, се појави нов проблем.
Имено, на пријателскиот натпревар помеѓу селекциите на Англија и Бразил одигран во саботата вечерта на „Вембли“, се повреди првотимецот на актуелниот европски шампион - Кајл Вокер.
Натпреварот го започна како стартер, но веќе во 20. минута мораше да го напушти теренот и засега е неизвесно дали ќе може да се опорави за дуелот против шпанскиот тим.
-Фрустрирачки е што како капитен морав да напуштам поради повреда, но секако ми беше чест да бидам дел од тој голем натпревар. Се надевам дека ќе се вратам на теренот што е можно поскоро, напиша Вокер на својот Инстаграм профил.
Следниот натпревар Англија го игра против Белгија во вторник, но речиси сигурно е, каков и да е резултатот од деталните лекарски анализи, Вокер да отсуствува од тимот.
-Треба да почекаме 24 или 48 часа и да видиме каква е ситуацијата со неговата повреда. Тој досега немал многу вакви ситуации во кариерата, па треба време да видиме како телото ќе реагира, изјави селекторот на Англичаните, Герет Саутгејт.
